«Атамекен» Қазақстан Республикасының Ұлттық кәсіпкерлер палатасы
Бизнестің сенімді серіктесі

Қаз

Елордалық компаниялардың 90-ға жуығы дуальды оқытуға қатысуға дайын

2023 жылғы 18 Сәуір
- Астана қаласы
3934 просмотров

Олар 77 кәсіп бойынша екі мыңнан астам оқушы орнын ұсына алады.

Бұл туралы «Кәсіптік білім және бизнес: серіктестер диалогы» қалалық форумы барысында Астана қаласы Кәсіпкерлер палатасының директоры Бейсен Жолболдиев айтты.

Форумда сөйлеген сөзінде ол қаланың өсуімен және қалалық инфрақұрылымның дамуымен елордада білікті кадрларға деген қажеттілік артып келе жатқанын атап өтті. Қазіргі сұранысты қанағаттандыру үшін Палата дуальды оқытудың Жол картасын іске асыру шеңберінде қала колледждері мен кәсіпорындарының өзара іс-қимылын нығайту жөніндегі жұмысқа белсенді қатысады.

«Елордада дуальды оқыту жүйесіне 60 мамандық бойынша 25 колледж және 229 кәсіпорын тартылды. Дуальды оқытудың 5466 шарты жасалды. Шарттардың басым бөлігі - құрылыс және коммуналдық шаруашылық саласы – 2772, сауда – 416, тұру және тамақтану бойынша қызмет көрсету саласы – 204, өңдеу өнеркәсібі – 588 мамандықтары бойынша жасалған. Дуальды жүйе бірден екі мәселені шешеді: оқу процесінде теориялық және практикалық дайындықты біріктіреді. Оқумен бір мезгілде оқушылар таңдаған мамандығын тікелей өндірісте меңгереді. Сонымен бірге ол кадрларды бекітуге және айналымды азайтуға ықпал етеді, бұл өндіріс үшін маңызды», – деді елордалық Палата директоры.

Сонымен қатар, дуальды оқытуға қатысу кәсіпорынның беделіне және оның еңбек нарығындағы жұмыс беруші ретіндегі беделіне оң әсер ететінін атап өтті. Жыл басында Астана қаласының Кәсіпкерлер палатасы кәсіпорындарға кадрларға қажеттілік тұрғысынан сауалнама жүргізді, оның ішінде 88 компания 77 кәсіп бойынша 2 109 оқушы орнын ұсына отырып, дуальды оқытуға қатысуға дайын екендіктерін мәлімдеді.

Компаниялар сатушы, маркетолог, бухгалтер, бухгалтер-кассир, кондитер, аспаз, техник-технолог, сату жөніндегі менеджер сияқты орта білікті мамандарға мұқтаж екенін атап өтті. Алдағы үш жылда - 2023 жылдан 2025 жылға дейін - 3,5 мыңға жуық кәсіпорын  21 797 маманға қажеттілік туралы мәлімдеді.

«Кәсіптік білім және бизнес: серіктестер диалогы» қалалық форумның мақсаты: Қазақстан Республикасында кәсіптік білім беруді жаңғырту шеңберінде ТжКБ ұйымдары жетекшілерінің көшбасшылық әлеуетін арттыру және жұмыс берушілермен әлеуметтік серіктестікті нығайту.

Форумға Қазақстан Республикасы Оқу-ағарту министрлігі, Қазақстан Республикасы Еңбек және халықты әлеуметтік қорғау министрлігі, Астана қаласы әкімдігінің Білім басқармасы, Астана қаласы әкімдігінің «Жұмыспен қамту орталығы» КММ, Астана қаласы әкімдігінің «Әдістемелік орталығы» МКҚК, «Таlар» КЕАҚ, Астана қаласы білім беру қызметкерлері кәсіподағының өкілдері, әлеуметтік серіктестері  қатысты.


Еншілес ұйымдар

Серіктестер